قلتها بالأمس بـ نهاية النقل المباشر
فوز لا لون و لا طعم و لا رائحة !
الشيء الوحيد الحلو بالمباراة كان بروز ايديرسون و استمرارية تألقه بعد لقاء سيينا
اما بقية اللاعبين و الامور التكتيكية فـ هي للأسف بشكل شبه عام سلبيـه
بداية مع فريق ماريبور صراحة فريق محترم و فريق قد يشكل لنا مشاكل على ارضه
اداءه جداً ممتاز انضباط تكتيكي على اعلى مستوى .. في حال فقدانهم الكرة نشوف 12 لاعب في ملعبهم
و اذا معاهم الكرة نشوف 4 الى 5 لاعبين يهجمون بشكل سريع و يعتمدون على السرعة و الحيويـة
بالنسبة لـ فريقنا فـ للأسف اعيد و اقول ان البدلاء عندنا ما يجملون !
و ان الفريق لازال بحاجة لـ تدعيم دكة البدلاء بـ لاعبين ممتازيـن خاصة الشق الهجومي
لأن في حالة الفوز مو مشكلة تنزل مدافع او وسط دفاعي .. لكن في حالة الخسارة فـ طبيعي لازم تنزل لاعب يمتلك الصبغة الهجوميـة لـ محاولة معادلة النتيجـة او قلب النتيجة الى فـوز
و مباراة ماريبور اثبتت ضعفنا من هالجانب و راح اتكلم عن اللاعبين بعد شوي
الخماسي الدفاعي كان سيء لأبعد الحدود اخطاء كثيرة ارتكبوها
تكتيكات غريبة تم اتباعها ما ادري وش كان يفكر فيها بيتكو .. خاصة انه آخر تمرين ركز كثير على المدافعين !
دياس ما يخلي حركات الثقة و الكبتنه زادته شوي بهالحركات .. تمريرات كثيرة خاطئة لعبها ما كان لها داعي
رغم ان كانا كان يوجهه العب لي او العب لـ سياني او لـ كافاندا
حتى على مستوى التفاهم ما كان كبير مع بقية المدافعين و هالشيء معذور فيه بحكم انهم يلعبون مع بعض لأول مرة
سياني ظهر بـ اداء مهزوز و كأنه تأثر جداً بـ حديث الاعلام عنه بـ مباراة نابولي رغم ان اداءه امام نابولي ما كان في هذا السوء .. و المشكلة ان بيتكو ما اعطاه الثقة لـ إظهار ما عنده لكن حط له ( حاضن ) و هو كونكو اللي ما لعب بـ اداءه المعتاد و السبب انه ما يبي يفتح مساحات عشان سياني ما يخطأ و هالشيء فيه نوع من الصحة لكن للأسف ضرره اكبر لأن بهالشكل راح يتم الغاء دور سياني بالكامل !!
فـ كونكو امس كان جداً مختلف و متواجد فقط بالدفاع .. حتى بالشوط الثاني هجمتين لـ كاندريفا وقف كثير ينتظر وصول كونكو له عشان يساعده .. العادة من يفتح كاندريفا خلفه على طول كونكو و نشوف ون تو او كونكو يعرض على طول
كافاندا قدم اداء ( جريء ) هجومياً لأنه كان يهجم و يدخل بين لاعبين ماريبور .. لكن كـ فعاليه للأسف ما عجبني ابد
يعني لاعبين ماريبور 11 لاعب واقف في ملعبهم تحاول تمرر كرات لـ هيرنانيس و التاتا .. صعب جداً توصلهم و ان وصلتهم فـ بتضايقهم .. الحل كان عبر سحب لاعبيهم بالتمريرات بين مدافعينا لين يفتحون الملعب و وقتها بـ تكون في ثغرات ( و هالشيء كان يقوله كانا لكن كافاندا كان يرفض تطبيقه )
و اللي شاف مباراة السيتي و دورتموند بـ يعرف طريقة اسلوب سحب اللاعبين لأن الالمان كانوا 11 لاعب في ملعبهم كـ حالة لاعبين ماريبور و مع ذلك السيتي قدر في اكثر من مرة يسحب لاعبين دورتموند و يبدء يبني الهجمـة
بالنسبة لـ كانا و كلام الاخوان بو بدر و عمر فـ هم معاهم حق في هذه المباراة .. اداء الالباني كان منخفض خاصة بالشوط الثاني ما شفناه يتحرك و يضغط مثل الشوط الاول
رغم ذلك اشوف توجيهاته صحيحة و تفكيره سليم اننا نطقطق باصات بين الدفاع لـ سحب لاعبين ماريبور
و ما ادري ليه يكون هالامر سلبي اذا كان المدرب نفسه يطلب من اللاعبين هالشيء في اكثر من مرة !
مستواه ما عندي شك فيه فـ انا اتابع اللاعب من سنوااااات و اعرف وش عنده في فرنسا و في انجلترا و في تركيا
اهتمام و عروض كبااااار الانديـة فيـه ما يجي من فرااااغ و من صدفـه .. لكن واضح ان التأقلم بين الاحتياطيين كان مفقود
العام الغالبية اشادت في مستواه بعد اصابة ماتوزاليم و بروكي اواخر الموسم و قدم كانا مستويات طيبه فيهم
ما يتم الحكم عليه من مباراة وحده فقط و رؤية الامور السلبية .. هو وظيفته تكسير الهجمات هذا دوره الفعلي كـ محور دفاعي بحت
يعني مباراة امس ايديرسون يلحق لاعب ماريبور و هو رافع ايدينه و دياس قاعد يرجع مع المدافع .. و لاعب ماريبور قاعد يتقدم و قرب يوصل منطقة الجزاء و البرازيليين اثنينهم نفس وضعيتهم جاء كانا و عطل اللاعب و اخذوا فاول
وكانا كان واضح من حركاته انه يعتب على ايديرسون تحديداً ان اللاعب يبي يدخل منطقة الجزاء و انت بس تركض وراه و رافع ايدينك !
اضافة الى تمريراته الطويلة ممتازة عكس تمريراته الارضيـة مثل لما قطع الكرة و بدء هجمة مرتدة و لكن بـ تمريرة ارضية سيئة لـ فلوكاري خطفها مدافع ماريبور .. اما تمريراته الطولية فـ شفنا كرتين كان ممكن تكون اهداف وحده لـ فلوكاري اللي طولها على نفسه و رجع للجناح و وحده لـ كاندريفا اللي شاتها بـ غرابة بالشبك الجانبي للمرمى
هيرنانيس للأسف كان اسوأ لاعب بالمباراة من وجهة نظري .. ما بين نهائي و ما سبب اي خطورة بـ استثناء الهجمة اول المباراة و تسديدة بالبلنتي واللا الباقي وجوده و عدمه واحد !!
كان المفروض يرجع مع التاتا و يبدأون الهجمة من الخلف لـ سحب لاعبين ماريبور .. لكن التاتا هو الوحيد اللي كان يأدي هالدور و بالشوط الاول كان يواجه بعض المشاكل لكن بالشوط الثاني نجح بـ امتياز و بفضل رب العالمين ثم هو كان سبب في الهدف و البلنتي
ايديرسون كان هو الحسنة الوحيدة باللقاء من وجهة نظري بـ مواصلة اداءه المميز من مباراة سيينا
المباريات الاولى اللي لعبها كـ بديل كان ضايع و واضح انه مو فاهم وش يسوي .. لكنه استمر على نفس الوتيرة و اظهر ما عنده قدام ماريبور و قدم مستوى ممتاز .. انطلاقاته من الجناح للعمق رائعة جداً جداً جداً
كاندريفا هو كاندريفا نفس اللعب نفس الستايل .. الحلو فيه امس رجع اكثر من مرة للدفاع و قطع الكرة في اكثر من لقطة .. لو يركد شوي خاصة قدام الجول بـ يكون عنصر هجومي فعااااااااااااااال جداً عبر احرازه للأهداف
فلوكاري قدم مستوى طيب قدام تكتلات لاعبين ماريبور بالدفاع خاصة من ناحية الترويض و صناعة اللعب رغم انه مهاجم
لكن طبعاً كـ فعالية هجوميـة بعيد جداً عن مستوى كلوزه لأن فلوكاري يستلم من العمق و ينزل للاطراف عكس الالماني
لكن بشكل عام اشوفه قدم مستوى ممتاز و تحليل التوبيلي بصراحة مدري شلون قايل
طبيعي المهاجم ما راح يظهر كثير قدام فريق متراجع كله داخل ملعبـه
ايضاً في لاعب بتكلم عنه و هو اونازي .. كنت متفائل بهالنيجيري خاصة في ظل اداءه في بدايات الموسم
لكن حالياً مستواه غريب من مباراة توتنهام الى مباراة ماريبور اداءه نازل بصراحة و متسرع و فيه ربشـه
دخوله كان واضح للضغط على حامل الكرة و طبق هالشيء بشكل طيب
لكن لم يضغط و يقطعها يتسرع في تمريرة او في فتح سبرنت غلط و تنقطع منـه !!
هالخال لازم يركد شوي حتى نستفيد منه صـح لأنه يمتلك امكانيات كبيرة
اخيراً بيتكو الى الآن ماني فاهم تبديلاتـه !!
تبديل زاراتي غريب بصراحـة .. توقعت شيء متوقع لكن صار شيء غير متوقع
التبديل صحيح مطرود منهم واحد و تقدر تضربهم و تخليهم يتراجعون لأنهم بدأوا يهجمون و هم ناقصين
لذلك توقعت ان الخطة راح تتحول الى 4-4-2 كلاسيكيـه لكن اتفاجأ ان زاراتي يلعب جناح ايسر و الاستمرار على نفس الخطة و هالاستمرار هذا خلا فريق ماريبور يواصل الضغط و الهجوم رغم انه منقوص منهم لاعب !!
تحير تبديلات بيتكو و ما ادري وش اللي يفكر فيـه !
اهم شي اننا فزنا و الحلو تعثر توتنهام مع باناثينايكوس
الحين عندنا بيسكارا و لازم نفوز فيها لأن بعدها بـ تكون عطلة لأسبوعين حق الفيفا
و وراها مباراتنا ضد ميلان و بعدها باناثينايكوس .. و الميلان ممكن يستفيد من هالتوقف و يرجعون مصابينهم
يعني قدام بيسكارا الثلاث نقاط هي المطلب الرئيسي و لازم ننهي المباراة في وقت مبكر