هارد لك للأسف .. خسارة تغث قدام فريق كان ممكن نتغلب عليـه
مع ذلك تحسب لـ مدرب ايمبولي التكتيك اللي سواه و نتج عنه هذا الانتصار المستحق للأسف
ايمبولي كان افضل و اخطر و لاعبينهم مستحوذين على اللعـب
حسب مجريات المباراة فـ مدرب ايمبولي لعب بـ 4 دفاع ثابتين من دون وجود اظهره !
حتى هيساي الالباني كان احتياطي على الرغم من كونه اساسي طول الموسم
وجود 4 مدافعين ثابتين ما يتقدمون اعطى الحرية لـ لاعبي وسط ايمبولي و هالشي زادهم قوة هجوميـه
و شفنا هالشي على ارض الملعب .. لاعبي وسط ايمبولي و اجنحتهم يطقطون على وسطنا ( الضعيف ) !
اللاعب الوحيد الممتاز بالوسط هو بيغليا و هو احد مفاتيح اللعب في لاتسيـو مع كاندريفا .. اما البقية ما يعتبرون مفاتيح لعب لأن ما عندهم حلول فرديه و بذلك يعتبرون كـ لاعبين مجهود .. بعضهم مجهوده يكون ممتاز بالمباراة و لكن في مباريات ثانيه يكون مجهوده ضعيف !! لذلك مستواهم متفاوت من مباراة الى مباراة
و من هاللاعبين ماوري و لوليتش و كافاندا في مباراة امس و بالمباريات السابقة بقية اللاعبين الآخرين على حسب التشكيل اللي صار
اما كـ مفاتيح لعب ما عندنا غير بيغليا و كاندريفا هم مصدر الخطورة و القوة في لاتسيـو
في لاعب من قبل الموسم و انا اضع هالتساؤل حوله و هو بارولو .. شنو الفايده منـه !؟
انتدابه كان فقط تسكيت للجماهير .. كـ مستوى ما هو ممتاز و لاهو جيد جداً
و انتدابه ايضاً كان سبب في تهميش اللاعبين الشباب اللي كان راح يكون المشروع لأجلهم ( كاتالدي و انتيش )
من بداية الموسم في كل المباريات كان اداءه عادي جداً .. ما يعتبر لاعب مؤثر ابداً ابداً
فقط يقطع مسافات كبيرة و يغطي مساحات كثيرة .. لكن النتيجة ؟ دون تأثير يذكر !
فـ بيولي يتحمل هالشيء و لازم يلعب بـ افضل اللاعبين و يبتعد عن هاذي المجاملات
حتى بالخطة و التكتيك لازم ينتبه للشيء هذا
خروج ماوري للاصابه و دخول ايديرسون كان عليه الف علامة استفهام ؟؟؟؟ !!
ايديرسون هاذي ثاني مباراة يلعب فيها بعد الـ خمس دقايق اللي لعبها و سجل فيها
تدخل لاعب بعيد عن اجواء المباراة في مباراة انت الطرف الاضعف ! هاذي قمة الغرابة !!
و شفنا اداء ايديرسون كان بعيد جداً جداً عن مستوياته اللي عرفناها عنه ايام الدوري الفرنسي
و شخصياً اعتقد اللاعب اصبح backup فقط و بيعه و ترحيله افضل حل لـ لاتسيـو
حتى مشاركة سياني بأستمرار عليها علامة استفهام .. سياني و دي فري كلهم ثقال و اي هجوم سريع بـ يسبب مشاكل عليهم
دي فري ما شاء الله عليه قاعد يتطور من مباراة لـ مباراة و قاعد يغطي على بطئه و بنيته الجسمانيه انه يعطي مسافة فاصله بينه و بين اي مهاجم يدخل عليـه
و تعلم من خطأه قدام الشعراوي في مباراة الميـلان اللي نتج عنها الهدف الاول
اما سياني عكسه يحب يعتمد على قوته البدنيه في التدخلات و لكن مو كل مرة تضبط و قدام ايمبولي و المهاجمين الشباب الصغار غير ماكاروني واجه مشاكل معاهم
هذا غير تمريراته الخاطئه اللي يقطع فيها الكور و يرجعها لـ وسط ايمبولي !!
فـ بيولي لازم ينتبه للنقطة هاذي اذا بـ يواجه مهاجمين سريعين عليه اشراك كانا مع دي فري بالدفاع .. و في يناير لازم يجينا مدافع جديد و قوي يعوض غياب جنتي المصاب
الحين قدامنا مباراة اليوفنتوس المنتعش بـ سباعيه على بارما .. الله يستر منهم و ان شاء الله في فترة التوقف هاذي يرجع باستا و رادو من اصاباتهم و خصوصاً الصربي لأن كافاندا وضعه ما يطمن و ممكن يتسبب في بلنتي بأي وقت