نادي ساليرنو او مثل ما سمّاه لوتيتـو ( ابن لاتسيـو ) تأهل بالجولة الماضيـه لـ دوري المحترفيـن و تحديداً لـ دوري الدرجة الرابعـة في الكالتشيـو .
مثل ما يعرف الجميـع هاذي القصـة بدأت بـ نهاية الموسم الماضي لما كان نادي ساليرنتينا متواجد بالدرجة الثانيـة و لكن بسبب افلاس النادي تم شطبـه .. و قرر ميزاروما ( اللي هو يسار الصورة ) شراء هذا النادي من جديد و تسجيله بـ دوري الهواة بـ اسم نادي ساليرنو كالتشيو .. و استعان ماركو ميزاروما بـ نسيبـه كلاوديو لوتيتـو لـ مساعدته في شؤون النادي .
اول شيء طبعاً كان لازم يشوفون مدرب و طاقم تدريبي معاه .. و الفكرة كانت احد مدربين اشبال لاتسيـو اما مدرب و طاقم اشبال الوطني ( اللي هو انزاغي و طاقمه ) او اشبال المقاطعات ( و اللي هو كارلو بيروني و طاقمـه ) .. و لوتيتـو فضل التمسك بـ انزاغي و ارسال بيروني و طاقمـه لـ قيادة فريق ساليرنو .
هذا كارلو بيروني و هو كـ لاعب احد ابناء نادي لاتسيـو و لعب من الـ 77 الى الـ 81 و انتقل بعدها الى روما ! لـ موسم واحد
و رجع بعدها الى لاتسيـو و بعدها لعب لـ اسكولي و لـ عدة اندية ثانيـة .
بدايـة الموسم لوتيتـو و تاري حاولوا يرسلون عدد من اللاعبين الشباب لـ ساليرنو عشان يلعبون بـ استمرار و يكونون تحت قيادة تدريبيـه لاتسياليـه .. لكن اغلب اللاعبين الشباب رفضوا اللعب بـ درجة الهواة و منهم مانشيني و كامبولي و تشيامانا و دي دومينغيز و بعض اللاعبين اللي الآخرين اللي فضلوا يلعبون بـ الدرجة الثالثه و الرابعـة على الانتقال لـ نادي مولود حديثاً يلعب بـ درجة الهواة .
اثنين من اللاتسياليـه الشباب وافقوا على هذا المخطط و هم الحارس ايناريللي و لاعب الوسط لاني .
هذا الحارس ايناريللي مع ساليرنو .. ساهم بشكل كبير في صعود فريقـه و يلعب كأساسي دايم رغم ان في حراس اكبر منه بالعمر .
ميزاروما هو مالك النادي يحضر المباريات و يصرف على الفريق .. لكن من ناحية الظهور الاعلامي فـ هو نادر جداً .. و من الناحيـة الاعلاميـه فـ لوتيتـو هو اللي قاعـد يقوم بهالدور .. هو اللي يصرح و يخاطب الجماهير و ما الى ذلك كونه يعمل كـ مستشار مدري كـ نائب لـ ميزاروما .
لوتيتـو يوم ضمن ساليرنو التأهل بعدها بـ يوم حضر الى مقر النادي .. الجماهير كانت موجوده و مستانسين بالصعود .. اللي يضحك ان الجماهير تغني لـ لوتيتـو و ساليرنو و ساحبين على ميزاروما ^_^ .. حتى بالمواقع الاخباريـه لـ ساليرنو دايم يكتبون ميزاروما تحت مسمى كـ مالك للفريق .. و لوتيتـو تحت مسمى كـ رئيس النادي .. و ممكن هالشيء يكون صحيح بس طبعاً راح يتغير هالشي بما ان ساليرنو صعد لدوري المحترفين .. و حسب لوائح الاتحاد الايطالي ممنوع طبعاً شخص يمسك نادييـن .. اما في دوري الهواه كل شيء عادي .. حتى مسألة اللاعب الاجنبي و الامور هاذي ما تنطبق على فرق الهواه .
هذا فيديو لوتيتـو يوم حضر مقر بعد ما تأهل الفريق
صعود ساليرنو اشوفه امر ايجابي من صالح لاتسيـو .. ارسال الجيل القديم من البريمافيرا لـ ساليرنو افضل من الاعارات اللي قاعد تصير لهم و فوق هذا ما يلعبون بشكل اساسي !! .. في ساليرنو مع العودة لـ دوري المحترفين راح تكون الفرصة اكبر لـ قبول الجيل القديم من البريمافيرا بالموافقة على الانتقال لـ ساليرنو .. يلعبون بشكل اساسي و تحت قيادة لاتسياليـه و حزتها الزيـن فيهم راح يفرض نفسـه و يكون لاتسيـو هو المستفيـد .
و توته توته خلصت الحتوته
