بالنسبة لأمور الديون فأنا أتفق معاك وأعرف شنو الي قاعد يسويه لوتيتو لكن بعض التصرفات الي يقوم فيها لوتيتو مثل تجاهل التعاقد مع لاعبين مميزين أو عدم جلب لاعبين نهائياً هي الي تخلي الجماهير تحقد عليه
يعني على سبيل المثال .. لوتيتو سوى حركه أيام ديليو روسي وأيام بالارديني وهي عدم ضم أي لاعب خلال الميركاتو الصيفي وأعتمد على اللاعبين المجانيين وبهذي الحاله وفر مبالغ ماليه طول الصيف .. صحيح أن هالشي هذا أغضبنا كعشاق للنادي سواء في إيطاليا أو بالوطن العربي لكن بنفس الوقت لاتسيو أستفاد مادياً .. لكن لوتيتو بهذي الحاله ضحى بالفريق كله وشفنا كيف تخطبنا بشكل كبير .. بأيام ديليو روسي أحتلينا المركز الـ 12 ومع بالارديني وريّا نافسنا على البقاء بسبب هذا الخطأ لكن لو تلاحظون أن لوتيتو عوض هالميركاتو في يناير وجلب عدة أسماء ساعدت الفريق على التحسن
لكن أرجع وأقولها أن لوتيتو ضحى بالفريق من أجل الفلوس حتى يعوض الديون .. وبهذي الحاله أتفق مع لوتيتو وأخالفه الراي بنفس الوقت .. أتفق معاه لأنه وفر مبالغ ماليه وأختلف معاه لأنه ضيع الفريق
بالنسبة لحقوق النقل فالحل الوحيد للوتيتو وربعه أنهم ياخذون حقهم هو يسوون نفس الحل ألي أستخدمه نابولي وهو الأمتناع عن نقل المباريات الي على أرضهم لأن الإتحاد الإيطالي مايجي إلا بالتهديد
بالنسبة للأخبار الي تقول عنها بأن لوتيتو ممكن ينضم مع الأنديه الخمسة علشان يكونون ضد الأنديه الـ 14 فأتوقع أنها إشاعه وحتى إذا كانت صحيح فلوتيتو مو غبي لهذي الدرجه أنه يتخلى عن 14 رئيس علشان خاطر مصحلته الشخصيه وبهذي الحاله يكون رئيس مكروه في إيطاليا وما يقدر يتفاوض مع أي نادي بالكالتشيو
الأنديه الخمسه لها نفوذها بسبب الفلوس الي عندهم فقط لا غير .. وما أعتقد أن القاعده الجماهيريه هي السبب لأن لو القاعده الجماهيريه هي السبب أكيد كل رئيس نادي بيجيب له جماهير المواسم الجايه من حسابه الشخصي ويقعدهم بالمدرجات ويقول أحسبوا المعدل الجماهيري وبهذي الحاله أكيد بياخذون فايدتهم مثل الأنديه الثانيه
الي يدور في إيطاليا وكواليسها كله من المافيا الي ماسكه الأنديه الكبيره ومساهمه فيها وأكبر مثل هذيك المره قريت في أحد الصحف الإيطاليه أن بيرلوسكوني يدفع سنوياً 600 مليون يورو للمافيا الإيطاليه للحمايه + تسير أموره الشخصيه داخل وخارج إيطاليا !!! هل تعتقدون أن هذا الشي ما يساهم بموضوع النقل ؟؟
مشكلة الأتحاد الإيطالي أنه محارب جميع الأنديه برفقة البلديات... يعني أول مره أشوف دولة تبي تطور من دوريها وتبيهم ينافسون على البطولات وتبي منتخبهم يصير قوي وهم محاربينهم وفوق هذا كله يقاسمونهم بالأرباح والعوائد
أقسم بالله مرات أحس أن الدوري الإيطالي دولة مستعمره من قبل الأتحاد الإيطالي وبلديات المناطق لأن مو معقوله فريق يلعب بالكالتشيو وعنده ميزانية جيده بعد كم موسم النادي يفلس !!
هذا جنوى رئيسه من أغنى الأنديه بالدوري الإيطالي لكن بعد كم موسم بالكالتشيو لهذا الفريق حالياً النادي بس هالموسم هذا عليه ديون قيمتها 40 مليون يورو هذا غير المواسم الي طافت !!!
بصراحه شي يقهر 
على العموم وبكل أختصار أقول حق لوتيتو .. لو تجري جري الوحوش فغير رزقك ما تحوش
الله يعطيك العافيه على الموضوع الراقي والمميز منك يالمتألق