هاردلك شباب ويا كثر ما احس بمراراه وانا اقولها بعد مباراة ديربي ضد غريمنا التاريخي واللي للاسف صاير عقده لنا في الفتره الاخيرة...!!!
لاتسيو للاسف أصبح الصدر الحنون لإنكسارات روما وتخبطه..!! يعني روما كل ما يصير ملطشه للكل ويسجل الإخفاقات على كل المستويات المحلية والخارجية ويكون على شفا الإنهيار يجيك فريقنا ويكل سهولة ويفتح ذراعيه ليقدم لهم الدعم المعنوي والنفسي طبعا" على حسابنا ليعودوا لترتيب اوراقهم مع دعم جماهيري بسبب تهزيئهم لنا واللي اصبح عاده للاسف...!!!
قلتها قبل وأعيدها انه هذه المباراة المفصلية على الاقل بالنسة لي يعني كنت اقول لو قدرنا نفوز على روما فنكون نستاهل نلعب ابطال اوروبا واذا ما قدرنا نتجاوزهم فللاسف نحنا ما نستاهل بغض النظر عن مجهودنا طول الموسم...!!!
لو تشوفون مشوارنا طول هالموسم قبل ما ينتهي بتشوفون انه ما قدرنا نفوز على فريق كبير بغض النظر على فوزنا على الإنتر اللي وقتها كانت مترنح وكان ينهزم من أضعف الفرق وحتى في هذيك المباراة ما كنا بنفوز لولا انه ظروف المباراة خدمتنا بشكل كبير وقلت هالكلام وقتها
في رأيي ما دام انك ما تقدر تفوز على الكبار فانت غير مؤهل لان تلعب في بطولة قوية كأبطال اوروبا اللي محتاج فيها انك تملك عقلية الفوز على الكبار ومقارعتهم على أقل تقدير
إذا ما تاهلنا لابطال اوروبا وهذا ما لا اتمناه بعد مهزلة البارحه فالمتوقع هو انه سيتم تجديد الثقه بالمدرب الشايب الفاشل ريا على اساس انه نجح بإقتدار في تحقيق الهدف المنشود وكلنا يعرف انه لو نجح ما بيكون كفاءه منه بقدر ما بتكون مشت معاه الظروف الكثيره واولها ضعف الدوري الإيطالي هذا الموسم واكبر دليل على ذلك هو انه ميلان متصدر رغم سوئه وتعريه بشكل واضح امام توتنهام...!!!
والإنتر منافسه مع سوئه ايضا" وشفناه على ارضه انفضح امام البايرن اللي ليس في وضعه هذا الموسم
ونابولي اللي ما قدر على منافسات الإتحاد الاوروبي وطلع منها بخفي حنين...!!
يعني الدوري الإيطالي هالسنة بين الاعور واالي يعرج والأبكم....!!!
وتكملة كلامي انه لو تاهلنا بقدرة قادر مع اني ما اتوقع بيجددون للشايب المنتهي ريا و في الصيف بيشترون لاعب لاعبين على اقصى تقدير على اساس انه تشكيلتنا مكتمله والدليل نجاحها في الوصول للتاهل المنشود...!! وطبعا" هاللاعبين ما بيكونون بالمستوى اللي يصنع الفارق مع استمرار المدرب الفاشل وتكتيكاته العقيمه اللي تحد وما تستفيد أصلا" من اقصى إمكانيات اللاعبين...!!
وبنروح أوروبا وطبعا" بنقابل فرق مستواها قوي من اللي ما نقدر نفوز عليهم اصلا"..!! وبنتخبط في الدوري لأننا لسنا مؤهلين نلعب كل ثلاث ايام وبيضيع التركيز بين ثلاث بطولات الدوري و ابطال اوروبا و بطولة الكاس و بنتخبط و بنفشل وبنعيد الإسطوانه بعدها ونحاول نتاهل لاوروبا اللي نصعد إليها كل أربع سنين مره كأنها كأس العالم بالنسبة لنا وطبعا" مع جيل آخر من اللاعبين...!!!
تعبنا ونحنا ننتظر نشوف لاتسيو قوي مره ثانية يقارع الكبار ويصنفونه من كبار الدوري الإيطالي كما كان مش لازم نفوز بالبطولات دايم بس على الاقل نكون دايم منافسين ويكون هبوط مستوانا هو الإستثناء مش تألقنا هو الإستثناء مثل ما يقولون حاليا" عننا اننا مفاجأة الدوري هالسنه...!!!
هالشي ما بتحقق إلا بهزه كبيرة للنادي سواء ببيع النادي او إستقالة لوتيتو لأنه مع إحترامي لكل مجهوداته اللي عملها مع لاتسيو فإنه كل يوم يثبت انه اصغر من ان يمسك نادي اسمه لاتسيو
أتمنى يحدث هالتغيير قريبا" لانه ملينا والله من اللي يصير لنادي بعراقة واسم لاتسيو اللي كل يوم يمر يفقد المزيد من مشجعيه ومحبيه حول العالم وشوفوا الفيس بوك والمنتديات الاجتبية بعد خسارة البارحه الكثير اعلنوا اعتزلوا تشجيع الفريق بعد خيبات الامل اللي سببها لهم مؤخرا"...!!
آسف اني استرسلت في الكلام بس والله من حر مافيني والقهر اللي بداخلي على هذا الكيان اللي عشقته ولازلت اعشقه و ساظل اعشقه مهما كان بس اتمنى اشوفه بحال أفضل.....
تحياتي