يعطيك العافيـة يا حسـام
موضوع رائـع وهي تعتبر وجهـة نظرك الشخصيـة ونحترمها بكل تأكيـد
ولكن صدقني لاتسيـو مو بحاجـة الى ريكيلمي وهنتلار وكابيل وسينا
وما هو محتاج لـ ضخ الاموال لجلب نجوم عالميـة عشان يجيب البطولات
لاتسيـو بحاجـة الى مدرب صارم .. مدرب شخصيتـة قويـة .. مدرب تكتيكي وذكـي
وعلى سبيل المثال بعطيك 3 أمثلـة للمدربيـن
مدرب صارم الشخصيـة .. الأفضل هو اللي يلعب !
وهذا من نوعيـة كابيلـو .. كابيلو يوم راح للريال وجاب بطولـة
قعــّد بيكهام و روبيرتو كارلوس و رييـس و روبينهـو وايميرسون بالأحتيـاط !
ليـه قعدهم لأنه شايف مستواهم سيء .. منو اللي لعب بدالهم
ميغيل توريس و مارسيلو و ديلا ريـد و هيغويـن و غاغـو
وهذا الشي نتـج عن عودة مستوى النجوم ما عدا ايمرسون
بيكهام و كارلوس و روبينهو و رييس بعد ما قعدوا بالدكة فترة طويلة
رجعوا و بدعـوا !
ولو ناخذ هالشي ونطبقـه على مدربنا الحالي .. فـ هو ما يمتلك الجرأه نهائياً انه يقعـد ليديسما احتياط
ما يمتلك الجرأه انـه يصرخ على ماوري ويقوله تبـديـل غصــب
ما يمتلك الجرأة نهائياً انـه يعطي فرصـة للاعبين الشباب في وضعهم في مباريات قويـة !!
النوعيـه الثانيـة .. نوعيـه المدرب الجماعـي
وهالشي شفناه في خواندي راموس مدرب اشبيليـه .. مدرب يحب اللعـب الجماعـي
اليوم تشوف الهجوم كريكازوف وشيفا و بكره الهجوم كانوتيـه وفابيانو .. ولا نشوف اي تغيير بالمستوى الهجومي
وبالوسـط كل يوم لاعبيـن .. مرة ريناتو وبولسين .. مرة ريناتو و ماريسكا .. مرة ماريسكا و بولسين
والاجنحـة نافاس والفيـس و بويرتا و ادريانو و كابيل ومدري منـو
ما عنده مشكلـة منو اللي يلعـب .. نهائياً ما عنده مشكلـة
ولو جيت تقارن هالشي في مدربنا !!
ما يحب اللعب الجماعي .. يحب اللعب ع المرتدات .. وما يحب التنويع باللاعبين !
حنا لو يغيب عندنا بانديف و دي سيلفستري تصير مناحـه وسالفة وانتضايـق !!
والسبب ان هاللاعبين على طول يلعبون .. ما يتم التنويع ابـداً
لاعبين اشبيليـه كلهم لاعبين رخاص من اندية ضعيفة بالبرازيل او ابناء النادي وحتى كانوتيه كان مهاجم احتياطي في توتنهام و استون فيلا !!
ولكـن رامـوس يحب التنويع وخلق المنافسـة ويحب اللعب الجماعي .. ويدرب فريقه انهم يلعبون بجماعيـه
فـ لو غاب الفيس و كانوتيه ونافاس و بولسين .. عادي يعوضهم بسهولـه
النوعيـه الثالثـه .. نوعيـه المدرب اللي يخلي اللاعـب نجـم !
وهاذي نوعيـه فينغـر مدرب الأرسنـال
اشترى لاعب برازيلي اسمه دينلسون بسعر رخيص واعتقد الكل يعرفه الحيـن .. وقال هذا تدعيم للمستقبل و راح يكون بفريق الشباب مدري فريق الرديـف
ابعـد عنه الإعلام والصحافـة .. و فجأه اصبح دينلسون اساسي وجيلبرتو سيلفا احتيـاط !!
ونفس الحالة مع اديباغور و هنري .. كليشي و آشلي كول .. ليونغبرغ و والكوت
والقائمـة تطول
هاذي نوعيـة المدرب اللي يخلي لاعبـه نجـم ويعطيه ثقة بنفسه اكثر ويستخرج مهاراته غصب عشان يستفيد منها
اما عندنا حنا !! كوزاك ما اظن بـ نشوفـه يلعب اساسي !! تويـا اشـك في هالشـي ! ديغـري الحارس الثالـث .. ما شفناه بالوديات ما اظـن بـ نشوفه نهائياً
فريقنا يحتاج لمدرب من هالنوعيات الثلاث .. وحزتها بـ تشوف حتى مانفرديني نجـم في لاتسيـو 