هلا وغـلا ماتدور
يالله حيــّـه
بالنسبـة للانتقـالات .. انتقالاتنا لا تقل عن الانديـه الثانيـه بشيء
الفرق الوحيـد بين ( نوعيـه ) اللاعبيـن ان الانديـه الثانيـه راح تلعب على اكثر من بطولـه
بس حنا ما عندنا اللا البطولات المحليـه الدوري و الكأس
وهذا الشيء من وجهـة نظري اشوفه في مصلحتنـا
بسبب انشغال الانديـة اللي راح تلعب بالبطولات الاوروبيـه
حنا راح يكون عندنا فرصـه اننا نستغل هالشي
مثل ما استغلـه الفيولا وخطف الرابع من قدام الميلان
وللعلم فقـط الانتر و روما ماسوا ميركاتو و لاشي !
بس شروا لاعب والباقي كله اهتمامات !!
\
\
بالنسبـة للاعبيـن الايطالييـن .. لاتسيـو ما صار ايطالي اللا يوم مسكـه لوتيتـو !
واللا ايام قبل سالاس و فيرون و سيميوني والميدا بوكسيتش و بوبورسكي و ندفد و كونسيساو و غيره وغيره وغيره
يمكن بس الدفاع اللي كان ايطالي
وبالنسبـة للاعبين الايطالييـن فـ نادراً ما تشوف لاعب ايطالي ممتاز في الانديـه الثانيـه غير الانديه الكبار
واذا قلنا نابولي على سبيل المثال ( كنافارو و دوميتزي و بلاسي ) امكانياتهم محدوده وفي عندنا لاعبين من مستواهم و افضل
يمكن النادي الوحيـد اللي فيه لاعبين ممتازيـن ايطاليين غير الانديه الكبار هو بارمـا
فـ لذلك هالشي طبيعي .. الميلان عواجيز ايطاليـه .. اليوفي آخر 3 مواسم ما شروا اللا ياكوينتا كـ صفقة ايطاليه قويـه ! رومـا عندهم بيروتا و كاسيتي و تونيتو والباقيين الايطاليين هم لاعبيـن طلعوا من فئة الشباب ( توتي - اكويلاني - دي روسي )
يعني هالشي مو بس في لاتسيـو هالشي موجود في الانديـه القويـه كلهـا
\
\
\
بالنسبـة للمركـز دام كاريزو موجود انا متفائـل حيـل
ولكـن يمكن اللي راح اقولـه ما يعجـب البعـض
انا اتمنى اننا نفوز بالكأس ( نبي بطــوووووولـــه ) و المركز يكون السادس او الخامـس
ما ابي الفريق يتأهل لدوري الابطال السنـة الجايـه
ما ابي التأهـل لمجرد التأهـل !
ودي اذا فريقنا تأهل يكون فريق قوي و كامله صفوفـه وصارت عنده خبره اوروبيـه
اللعـب في كأس الاتحاد الاوروبي راح يعطي الفريق خبره اكبر ويدخلون اجواء المباريات الاوروبيـه اكثر
وبعدها اتمنى التأهل للمنافسـه مو التأهل للتأهل 
وجهـة نظري
وشكراً لك يا الغالي على هالموضوع النقاشي الحلو