مـنـتـدى لاتـسـيـو لـلـعـرب - تعميـم إداري بخصـوص المحتـوى المخفـي

مـنـتـدى لاتـسـيـو لـلـعـرب (http://www.lazio4arab.net/montada/index.php)

- شبـكـة لاتسيــو للعــرب (http://www.lazio4arab.net/montada/forumdisplay.php?f=33)

- - تعميـم إداري بخصـوص المحتـوى المخفـي (http://www.lazio4arab.net/montada/showthread.php?t=27364)

تعميـم إداري بخصـوص المحتـوى المخفـي

بسم الله الرحمن الرحيم
السلام عليكم ورحمة الله وبركاته
الحمدلله والصلاة والسلام على رسول الله وعلى آله وصحبه أجمعين

اما بعـد

يا ايها الشعـب اللاتسيالي العـريـق ^_^

شلونـكم يا الربـع وش اخبـاركم
ان شاء الله انكم تكونون بخيـر وصحـه و عافيـه

بالإعلان السابـق ذكرنـا بعض النقاط والخطط المستقبليـه اللي نفكر نعملهـا
ابرزهـا مثل ما شفتـوا و عرفتـوا مسألـه المحتـوى المخفـي

اللي صايـر عليهـا ضجـه بـ قسم النسـور

قرينا ردود من بعض الاخـوان ضيقت صدورنا شوي بس يمونون وهم على العين و الراس

في مثل يقول [ من واخذ رفيقه على اول زلـه خلاّه الزمان بليـا رفيـق ]

حنا اذا كان قرارنـا فاشـل مثلاً او سخيـف او مالـه داعـي
وكانت هاذي هي الزلــّه الاولـى لنـا

يا اخي قصّوا علينـا ^_^
جاملونـا شوي ^_^

مو على طول تزعلون علينـا

القرار ذكرنـاه بالاعلان السابـق و ذكرنـا الاسبـاب
والبعض يحسـب ان كل همنـا اننا نبي مشاركات اكثـر

لا والله .. مسأله المشاركات هي للتحفيز فقط وما تشكل يمكن 10 % من فكرتنـا للقرار

المسألة تتعدى هالشي بـ كثيـر

وذكرنا السبب الرئيسي للفكـرة .. السبب هو حفظ حقوق لاتسيـو للعـرب
لا اكثـر ولا أقـل

للتأكيـد فقـط عشان ما تقولون ان الشباب تألف من مخهـا

اخذوا اي خبـر كتب قبل ثلاث ايام او اسبوع وانسخوا سطر واللا سطرين منـه
وحطوه في جـوجـل

تلقون الخبر في لاتسيو للعرب .. وفي المنتدى الفلاني و في المنتدى العلاني
ومدري ويـن .. ويمكن تلقونـه حتى في منتديات اجنبيـه بعـد

يعني انا ابي اتكلم بالفقرة الجايـه بشكل شخصي ولكني اجزم ومتأكد مليون بالميـه
ان حالي من حال كل اخواني المراقبيـن و اخواني اللي يترجمون الاخبار بشكل دايـم

يعني انا يوم اني اترجم الخبـر واحطـه في لاتسيـو للعـرب .. ليـه اسوي هالشي ؟
ابي ربعـي و اخواني توصلهم المعلومـه بأسرع وقـت و بـ اسهل طريقـه وبأفضل صـورة

لاني ماخذ فلوس من احـد .. و محد حاط السيف على رقبتي وقايل ان ما ترجمت بذبحك
ولا احد ماسك علي شي , مقطع بلوتوث خليع :bleh: هههههههههههههههه

يعني اقدر اقرى الخبـر واحط راسي وانام واعرف اخبار لاتسيـو بشكل دايـم
واقول وش لي بـ اعضاء لاتسيـو للعـرب وش لي بالسوالف هاذي كلهـا

بس و ربي ما يهون علي هالشي .. والله ثم والله ثم والله
لا هو تنمـق ولا مجاملـه .. والله اني عادكم كلكم ربعي و اخواني
والعشرة هاذي اللي بيننا تسوى لهـا ديـار و عـرب

مسألة المحتوى المخفي عشان نحفـظ حقوقنـا لا اكثـر و لا أقـل
زهقنـا من هالحبربش و هالسروقيـن .. لا واللي يقهـر تلقاهم مشرفين في منتداهم اللي هم فيـه

يمكن البعض يستصغر مسألة السرقـه و يشوفها شي عادي
بس لو هو عايشهـا بـ ينقهر و ينغـث و ينغبـن

يعني تخيل نفسـك تطامر من موقع لـ موقع
وترجم الخبـر و تقعد يمكن على ترجمة الاخبار الموجوده ساعة ونص واللا ساعتيـن واحيان اكثـر

يجي واحـد بارده مبرده بـ خمس دقايق ( كوبي بيست ) وياخذ تعبـك

اللي يشوفها شي عادي يالربـع خلـّه يعلمني وين بيتهـم عشان اسرق اغراضـه :bleh:

نجي لـ مسألة الردود الاخيـرة من بعض اخـواني

الصورة اللي تطلـع اذا كان المحتـوى مخفـي هي هاذي

http://www.lazio4arab.com/montada/mw...ttons/hide.gif

ضع رد لـ يظهر لك المحتـوى

يعني مثل كلمـة الله يعطيـك العافيـه اكتبهـا بالرد .. كلمة طيبـه وبـ تاخذ اجر فيها لأنك دعيـت لأحد اخوانـك

لو تكتبها بـ يطلع لك المحتوى المخفي

يعني مثل كلمـة مشكور وما قصـرت

في كلمـات مسهلينهـا عليكم ^_^

شـكــ وبارك الله فيك ـــرا لك ... لك مني أجمل تحية .
موفق بإذن الله ... لك مني أجمل تحية .

استعملوها ما فيها اي مشكلـه

بعض اخواني الله يجزاهم خيـر يقول شلون ارد واللا اكتب تعليق وانا ما شفت الخبـر

انت رد من هالردود اللي فوق واللا مثلها واللا اطيب منهـا
وبـ يطلع المحتوى المخفـي

عندك تعليق وتحب تشارك اخوانك بـ تعليقك واللا تناقشهم

ابـد بـ ثواني اضغـط على http://www.lazio4arab.com/montada/La...ttons/edit.gif وعدل مشاركتـك

ان اخذت منك العمليـه اكثر من دقيقـه .. انا احلق شاربـي :bleh::bleh:

وبعض الشباب الله يجزاهم كل خيـر قاعد يستعملون هالطريقـه وامورهـم طيبــه
يكتـب له رد مثل مشكور واللا يعطيك العافيـه .. عنده تعليق على الخبر ضغط على تعديل و اضاف تعليقه على الخبـر

والله العظيـم سهلـه والله

1 + 1 = 2

في ردود ما حبيناها بالاخبار الاخيـرة البعض يحط اقتباسات و البعض يكتب كلام مو مفهوم تئنانمبئرنكمء عشان يطلع له الخبـر

نتمنى نتمنى ان مثل هالردود ما تكون موجوده بالمستقبـل

وبالأخيـر راح يتـم اضافـه مجموعـه من الاعضـاء للإنضمام الى عضويـه الـ VIP
نعتذر منهـم اننا نسيناهم بالمرة الاولى .. ولكن راح يتم اضافتهم قريباً ان شاء الله

واللي عنده شي بخاطره ابـد المحل محلكم يكتب الرد اللي يبيـه ويذكر وجهـه نظـره ونتناقش وياه ونبين له وجهة نظرنـا

وان شاء الله ما يصير خاطركم اللا طيـب

ودمتـم بـ أحسن حال .