|
رد: تـوازن لوتيتـو .. و مشـروع ’’ تاريبيتكـو ’’ .. و الاساس الصلب طيب إذا هذا تفكيره لا يفكر ينافس بدوري الأبطال وهو عنده لاعبين كبار بالعمر وماعندهم القدره على اللعب ثلاث جبهات أقولها للمره الألف .. لوتيتو ناجح كرجل إقتصادي لكنه فاشل كرجل يدير فريق كرة قدم وهذا الي قاعد نشوفه بالسنوات الثلاث الأخيره بالذات يعني أحد أهم أسباب تراجع مستوى لاتسيو بالسنوات الثلاث الأخيره وعدم التأهل لدوري الأبطال هو عدم تعزيز صفوف الفريق بالمركاتو الشتوي !! الموسم الماضي لوتيتو وفر 14 مليون يورو للتعاقد مع لاعب سوبر وهو هوندا وبالأخير ما شفناه ولا شفنا غيره .. ونفس الشي مع أندرسون هذا الموسم ووفر 7.5 مليون للتعاقد معاه وماشفنا شي وبالأخير محصلة مجموع قيمة اللاعبين هي 21.5 مليون وفرها وما تم صرفها لغاية الحين !! لوتيتو لو في كل موسم يتعاقد مع لاعب سوبر أو لاعب شاب مستواه جيد جداً كان ما شاف الإنتقاد الي يشوفه الحين على سبيل المثال ماسيمو موراتي .. أكثر رئيس بإيطاليا تعاقد مع لاعبين وكل اللاعبين الي تعاقد معاهم مافيهم لاعب سوبر إلا كاسانو أما البقيه لاعبين جيدين إلى متوسطين المستوى وبهذي الحاله موراتي ضحك على جماهير الإنتر من خلال التعاقد مع 11 لاعب بالمركاتو الصيفي والشتوي وأنساهم موضوع التعاقد مع لاعب كبير لأنه مكلف ومايملك ميزانية قوية لو نشوف الأسماء الي تعاقد معاها موراتي نلاحظ أن أغلبها من الكالتشيو عن طريق الإعارات .. صحيح أن مستوى الإنتر متراجع لكن سبب تراجعه أشوفه من المدرب مو اللاعبين لأن اللاعبين الي يملكهم ستراماتشوني كلهم دوليين لكنه مايملك الخبره الكافيه لإدارة الفريق لو لوتيتو في كل موسم يجهز 15 مليون للمركاتو يتعاقد مع لاعب سوبر أو لاعب جيد إلى جيد جداً تكون قيمته 7 أو 10 مليون ويتعاقد مع ثلاث أربع لاعبين من إيطاليا عن طريق الإعارات يكون بهذي الحاله تعاقد مع 4 أو 5 لاعبين وسد حاجات الفريق !! لكن الي نشوفه أن لوتيتو مو قاعد يسد حاجات الفريق وفوق هذا يعمل مشاكل مع اللاعبين !! طيب كيف تبي الفريق ينافس وأنت تحاربه ؟؟ وقاعد يفرط بفرص ذهبيه مثل عدم بيع زاراتي للنادي الأوكراني .. يعني لو بايعه بـ 9 مليون راح يوفرها للموسم الجاي لأن زاراتي راح يخلص عقده 2014 وهذا يعني أن قيمته راح تقل إذا بعناه بالصيف لأن عقده راح يتبقى منه سنه وإذا ما تبي تتعاقد مع لاعبين فلا تعمل مشاكل مع اللاعبين المتوفرين عندك لأنك بحاجتهم .. زاراتي ما أبي أتكلم عنه لأنه طفل والمدرب عجز منه وفوجيا أستبعده بيتكوفيتش ودياكيتيه ثلاث سنوات يطالب بتجديد عقده ومحد راد عليه لغاية ما وصل لمرحلة أنه يبالغ في طلباته ومخه قفل وحالياً راح يطلع بالمجان بالرغم أن قيمته الحقيقه 6 مليون لكن لاعب موهوب مثل كافاندا يعطيك 10 سنوات قدام ويقدم مستوى ممتاز وأحتمال إذا تألق نبيعه بعد كم موسم بمبلغ محترم ليش يتم التفريط فيه بالرغم إننا محتاجينه !! و لو تلاحظون بالسنوات الأخيره أن أغلب لاعبينا ينتقلون إما عن طريق الإعارات أو إنتهاء العقود لأنهم بصراحه لاعبين متواضعين المستوى أو أن لوتيتو يبالغ في طلباته الماليه بشكل كبير أما بخصوص الموسم القادم فأنا أتفق معاك إن لوتيتو راح يقوم بمركاتو جيد لأن أغلب اللاعبين راح يعتزلون لكن ما أتوقع منه أنه يتعاقد مع لاعبين سوبر وواضح من الأسماء الي يفكر فيها أنه يبي يجدد الفريق بلاعبين شباب لكن سياسة الشباب ما تنجح بيوم وليله والمفروض في كل موسم يتعاقد مع شاب ولا أثنين بالإضافه للاعبين خبره حتى يتعودون على بعض وما يطيح بنفس الخطأ الي طاح فيه فريق الميردا لما تعاقدوا مع مجموعه كبيره من الشباب وفريقهم ضايع صارله موسمين بهذا الموسم بصراحه أقولها بإننا ماراح نتأهل لدوري الأبطال لأن ميلان خرج من كل البطولات وصعب يفرط بالمركز الثالث وفوق هذا لاعبينا يعانون من الإرهاق بسبب بطولة اليورو ليج والنقطه الأهم والي لازم الكل يقتنع فيها .. إن الفريق إذا مافيه لاعبين شلون بالله نقدر نلعب دوري الأبطال ؟؟ وإن الرئيس إذا ما يدعم الفريق شلون نلعب دوري الأبطال على لوتيتو أنه يحلم قد إمكانياته .. مو يطلب دوري الأبطال بلاعبين ما يقدرون يلعبون ثلاث مباريات ورى بعض وشلون نواجه فرق كبيره من نخبة الفرق الأوروبيه بلاعبين مثل ليديسما وكونكو ودياس وغيرهم ؟؟ نقطه أخيره نسيت أقولها فيما يخص موضوع التوازن : لوتيتو ما كان يقصد بالتوازن ميزانية النادي .. كل تصاريحه الي طلع فيها قال :" لا نريد تخريب شكل الفريق من خلال إدخال لاعبين جدد بتشكيلة المدرب وعمل مشاكل بغرفة الملابس " هذا هو التوازن الي كان يتكلم عنه لوتيتو .. لكنه مرات يقول :" سنتعاقد مع لاعبين حسب شروطنا الماليه " وهذا دليل أنه مو ناوي يتعاقد مع لاعبين جدد لأنه شاف الفريق يفوز بمرحلة الذهاب وحسباله أن المستوى راح يكون ثابت لنهاية الموسم والله يعطيك العافيه على الموضوع... ونحترم رايك الي تكلمت فيه |
رد: تـوازن لوتيتـو .. و مشـروع ’’ تاريبيتكـو ’’ .. و الاساس الصلب اقتباس:
سياسة لوتيتـو سياسة ناجحه في ادارة النادي .. و لكن احياناً تجيك فرص ذهبيـه المفروض تجازف في اقتناصها .. و انا ذكرت هالشيء في الموضوع لوتيتـو يخصص ميزانيه محدد و ما يبي يزيد عليها يورو واحد للأسف .. لو يجازف احيان و يزيد 2 مليون فرضاً على الميزانية كان ممكن هالشيء يقوي الفريق اكثر و اكثر تعقيب بسيط فقط على الكلام اللي بالاحمر .. و هو نفس التعقيب اللي فوق بـ عدم مجازفة لوتيتـو بـ رفع المزانية كثير من اللاعبين يعانون من مشاكل عضليه و لذلك نشوفهم في فترة الشتاء تجيهم اصابات و السبب البرد و طريقة التسخين بـ عكس لما يكون الجو صيف و حر .. اي رئيس نادي او اي شي شخص عنده معامله او مشروع دائماً يضع السيناريو الاسوأ عشان يكون مجهز الحلول .. فـ للأسف لوتيتـو المفروض كان مجهز هالشيء و على الأقل الـ 2 مليون اللي لو زايدها فوق الميزانية كان ممكن يجيب فيها لاعبين اثنين كـ إعارة ممكن ينفعون الفريق \ \ \ اقتباس:
اولاً نص مليار لير ايطالي = 9 آلاف كويتي = كامري من الوكاله ^_^ فـ مستحيل تماماً ان كرانيوتي يقصد ان ديون لاتسيو نص مليار ايطالي هالمبلغ انا وياك لو نسوي قطيـه نشتري النادي ^_^ هههههههههههههههه ثانياً اعتذر عن خطأ بسيط لأني دايم اربط تصريح كرانيوتي عن الديون بـ لوتيتـو و انسى الرئيس المحامي لونغو فـ لـ نفرض ان لونغو قدر بشكل عجيب انه خلال سنته الرئاسية يشيل 100 مليون يورو 9 مليون قيمة ستام للميلان + 16 مليون رحيل فيوري و كورادي كـ تعويض عن ديون صفقة مانديتا + الاسهم اللي تم اعطائها لـ بعض اللاعبين اللي وافقوا ياخذون اسهم في النادي كـ تعويض عن رواتبهم المتأخرة + مبالغ نجهلها فـ قول المبلغ كله 100 مليون يورو لونغو قدر عليـه باقي 400 مليون .. منو دفعها ؟ او سؤال ادق رواتب دينو باجيو المتأخره منو دفعها ؟ رواتب كلاوديو لوبيز المتأخرة منو دفعها ؟ رواتب فلان و فلان و فلان منو دفعها ؟ هذا خبر قديم بـ 2007 عن احد اللاعبين يؤكد استلامه لـ رواتبه بـ انتظام اقتباس:
انا اذكر في خبر كتبه عمر او منيف بس ماني لاقيه و هو مانديتا في 2008 اذا ماني غلطان كان رافع قضية على لاتسيـو يطالب بـ مستحقات متأخرة له بـ قيمة 5 مدري 6 مليون !! حتى فيوري و كورادي يوم انتقلوا لـ فالنسيا رفعوا قضيه على لوتيتـو يطالبونه بـ رواتبهم كاش لذلك تلاحظ ان لوتيتـو مهمش اي لاعب قديم اختلف معاه على طريقة دفع المرتبات المتأخرة .. لأن لوتيتـو تفاوض معاهم ان يدفع لهم رواتبهم بشكل شهري و كأنهم لاعبين بالنادي البعض وافق مثل حالة ماتوزي و انزاغي و بارونيو و غيرهم من بعض اللاعبين .. لكن البعض الآخر ما وافق و يبي حقوقه الماليه كاش هالمبالغ هاذي منو دفعها ؟ فـ مسألة شراء النادي و اسهم النادي مختلفه تماماً عن دفع ديون كرانيوتي لوتيتـو ما يبي يكون رئيس و يحط خطه و يدفع فلوس و يجي واحد بعده بـ كم سنه و يشتري عدد اسهم اكثر منه و يصير هو رئيس النادي و المتحكم فيـه لذلك لو تلاحظ ان لوتيتـو سوى حركة خبيثه و لكن قانونيه .. انه اشترى عدد من الاسهم و نسيبه ميزاروما اشترى عدد آخر من الاسهم و لو جمعت اسهم لوتيتـو و ميزاروما يصير عدد الاسهم بالخمسينات تقريباً و بذلك يكون اكثر من النص وهذا اللي سواه لوتيتـو بعد فترة زاد عدد اسهمه شوي شوي و بعدها اشترى اسهم ميزاروما لـ يكون صاحب اكبر نسبه عدد اسهم و بذلك يكون رئيس مجلس الادارة لـ مؤسسة لاتسيو الرياضية بحكمه حامل اكبر عدد من الاسهم فـ السؤال اذا مو لوتيتـو اللي دفع ديون كرانيوتي المقدرة بـ اكثر من نص مليار يورو .. منو دفعها ؟ |
رد: تـوازن لوتيتـو .. و مشـروع ’’ تاريبيتكـو ’’ .. و الاساس الصلب اقتباس:
الموضوع عباره عن توقعي بـ شكل الفريق الموسم المقبل مع توقعي بـ وجود ميزانية فائضه و تقريباً الموسم القادم 20 لاعب بـ يكون عندنا لذلك من المتوقع جداً انه بـ يكون ميركاتو طيب فـ هذا هو اساس الموضوع وما تشعبت في مواضيع ثانيـه \ \ \ اقتباس:
واللي ودي امسك النادي :vora[1]: ما عندك واسطه هههههههههههههههههه ^_^ \ \ \ اقتباس:
و شاكر لك على الاضافة المميزه اكثر ما اتفق معك فيه هو حاجة الفريق الماسه لـ مدافع ايسر دياس و سياني و كانا و حتى بيافا افضل مدافع عندنا لما يلعبون على الجهة اليسرى من الدفاع يخربطون كثير لأنهم ما يلعبون بالقدم اليسرى فـ انا اشوف انه من اهم الصفقات الضرورية هو جلب مدافع ايسر اما بالنسبة لـ خطة الثلاثي الدفاع فـ هي ممكن تنجح و بشكل كبير جداً لكن المشكلة ان خصائص لاعبينا لا تصلح لـ تطبيقها لأن هالخطة بالذات تحتاج لـ لاعبين مراكض ما يوقفون .. و حنا عندنا ليديسما و ماوري و هيرنانيس !! فـ صعب جداً تطبق هالخطة و انت تعتمد على هالاسماء بشكل اساسي \ \ \ اقتباس:
اتفق معاك في نظرة لوتيتـو و سياسته و انا اشيد فيها لكن ودي لو يجازف لوتيتـو شوي لأن في فرص ذهبيه للأسف طوفها كثير يعني موراتي يوم شاف ان اليوفي هبط و ميلان متوهق بـ مشاكل بيرلسكوني و زوجتـه لقى انها فرصة العمر بالنسبة لـه و بدء بـ تدعيم الفريق بشكل مناسب و حسب حاجات المدرب وحقق مراده بالحصول على البطولات و تكوين اسم قوي للأنتـر واللا الانتر من زمان و هو يجيب لاعبين و يجيب نجوم لكن سوء تخطيط من ادارة موراتي ما خلت فريقه ينجح حالياً في ايطاليا ما في غير اليوفي بصراحـة .. الميلان مقحط و الانتر ضايع و روما انطر مشروعهم بعد 7 سنين مدري كم .. فـ هي فرصة سانحه لـ لوتيتـو انه ينافس على اللقب مو بس على مقعد لـ دوري الابطال .. و هالشيء سواه دي لورينتس يوم شاف ان الاندية الباقية متهالكه بدء بـ ضخ الاموال للفريق من اجل المنافسه الفعليـه \ \ \ اقتباس:
اتفق معاك تماماً تماماً بـ خصوص موضوع الإدارة و ذكرت هالشيء في الموضوع الإدارة عندنا بحاجة الى تعزيز لازم يكون هناك مستشار رياضي و يكون عندنا كشافين مواهب مستحيل ان يتم إدارة النادي من قبل شخصين فقط و الشخص الثاني اللي هو تاري ما يتمتع بـ كافة الصلاحيات اللازمه لـ تأديه عمله على اكمل وجه لكن الحلو مثل ما تفضلت ان لاتسيو يتحسن اكثر و اكثر .. و ان شاء الله هالبوادر الايجابيه نشوفها قريباً على ارض الواقع \ \ \ اقتباس:
\ \ اهلين عمر المشكلة انك صعب تكون مشجع و تهمك النتائج فقط اما تكون متفرج و تتفرج و تتابع فقط .. او تكون مشجع و يهمك كل شيء صعب انك تطلب من المديون فلوس .. و صعب تطلب من الفقير عيش الحكم الحقيقي على لوتيتـو بعد انهاء ديون كرانيوتي الخامس و الرابع و حالياً نهائي الكأس وصلت له و تنافس في اوروبا هذا غير تحقيق بطولة الكأس و السوبر و هو مديون و رايح فيها و القادم ان شاء الله اجمـل |
رد: تـوازن لوتيتـو .. و مشـروع ’’ تاريبيتكـو ’’ .. و الاساس الصلب اقتباس:
اذا لوتيتو دفع 500 مليون يورو ديون كرانيوتي في فترة 5 او 6 سنوات ومشى الفريق بهالفترة ليه مايدفع مثلها في شراء لاعبين الآن اذا ماعليه ديون؟؟ وليه يناشب كافندا ودياكتيه وقبلهم بانديف وليدسما ودي سلفستري على فارق راتب سنوي مية او ميتين الف؟؟ لوتيتو مايحط شي من جيبه للاتسيو بدون مقابل والشي الوحيد اللي دفعه من جيبه اخذ مقابله اسهم ديون مصلحة الضرايب مازالت ماشية على لاتسيو 20 سنة من اتفاقه مع مصلحة الضرايب على تمديدها وتقليل سعر الدفعات الديون القصيرة والبسيطة من مرتبات متأخرة وسلفة بنك هي اللي خلصها ومن مداخيل النادي مو من جيبه طبعا واللي يخليني اقول انها مو من جيبه هي تصرفاته مع اللاعبين وبالميركاتو تصرفات واحد محدود بأنه مايدفع اكثر من مداخيل النادي تدري قبل لوتيتو لاتسيو كان يدفع 8 مليون تقريبا كل 3 شهور لمصلحة الضرايب من ديون كرانيوتي ومرتبات اللاعبين كانت خيالية النقطتين هذي تعامل معها لوتيتو مثل ماذكرت لك بردي السابق ومشى فيها امور النادي بس لو عنده 500 مليون ماتردد البنك في بيعة لاتسيو للوتيتو وهذاك تقولها في ردك ان نسيبه اشترى اسهم حتى يغطون 50% طيب لوتيتو اللي يقدر يدفع 500 مليون من جيبه في 5 سنوات مايقدر يشتري 50% من اسهم لاتسيو من البداية ومدخل معه نسيبه ليه؟؟ السبب بسيط ... لأن لوتيتو ماكان عنده كاش يشتري فيها 50% من اول مرة |
رد: تـوازن لوتيتـو .. و مشـروع ’’ تاريبيتكـو ’’ .. و الاساس الصلب الله يعطيك الف الف الف عافيه يا عواد ،، و ولكم باك يا شمعه المنتدي و الله يفك عوقك ان شاءالله ،، اما بخصوص الموضوع ،، فـ كل اللي كنت بقوله قالوه الاخوه عبدالرجمن و منيف ،، و متابع معاكم بالتوفيق |
رد: تـوازن لوتيتـو .. و مشـروع ’’ تاريبيتكـو ’’ .. و الاساس الصلب الله يعطيك الف الف الف عافيه يا عواد |
رد: تـوازن لوتيتـو .. و مشـروع ’’ تاريبيتكـو ’’ .. و الاساس الصلب اقتباس:
بمعنى ما تهمني المقصد لوتيتو مايحطها عذر سبق وقلتوا ٥ سنوات وراحت والان راحت عشر وصدقني سياسة لوتيتو تقشفيه ومستقبلها غير واضح شخصياً ماعندي ثقة في لوتيتو ومسالة توازنه هذا وتوقعاتك هذه يبغالها جلسة مطولة الفريق من جرف لدحديرة وكل ماحاول ينافس طاح احيانا اشك انه يتعمد يسقط الفريق لان المنافسة بتفتح له ابواب هو في غنى عنها مثل رفع الرواتب وشراء لاعبين سوبر ومداخيل اكبر من المصاريف فهو مستمر يضحك ع الجمهور ويوهمهم بالمنافسة كل سنة وانه رفع من مستوى الفريق عن الموسم الي قبله وبالمحصلة النهائية تشوف نفسك طلعت من الموسم بلاحمص |
رد: تـوازن لوتيتـو .. و مشـروع ’’ تاريبيتكـو ’’ .. و الاساس الصلب أولا أهنئك يا عواد على الي كتبته أنا راح أرجع اسرد لك رد عريض وراح اجيبلك ما يملكه لوتيتو في بورصة ميلانو و بورصة شتوتغارت واتفق معك كثير لكن اختلف في شئ هو أن لوتيتو متناقض جداً كيف شخص يبحث عن توازن وعنده ديون للضرائب ويبي يبني مدينه عالميه في ظرف سنتين أو ثلاثه وللعلم أسهم لاتسيو له شهر وماهبطت وما تعرف إلا الأخضر فقط عكس اليوفي إلي نازل سهمه هو و ميلان و الشي المحير إذا عليك ديون وما تقدر تجيب لاعبين و عقودك غامضه مثل إزي بلاي كيف بتبني مدينه اقل ماتدفع فيها هو 500 مليون إلي واثق منه ومتأكد أن لوتيتو يملك المال لأجل أن ينافس عالاسكوديتو لكنه بخيل ويحاول يكسب ما خسره في النادي ثم يبدء مشروع الانتفاضه |
رد: تـوازن لوتيتـو .. و مشـروع ’’ تاريبيتكـو ’’ .. و الاساس الصلب كفيت ووفيت شكرا خوي |
رد: تـوازن لوتيتـو .. و مشـروع ’’ تاريبيتكـو ’’ .. و الاساس الصلب ما نقدر نحكم على لوتيتو بانه بيستمر ع البخل هذا لا احد يعلم ربما بعد عدة مواسم لوتيتو يدعم الفريق بلاعبين ستارز مع الوجيه الشابة المميزة بالفريق ويكون من أفضل الفرق بايطاليا وعندي أمل بهذا المشروع بالمحافظة على الاعبين المميزين والشباب مثل ماركيتي ورادو وهيرنانيس و قونزاليس وكاندريفا ولوليتش واونازي وكيتا ولاعبين البريمافيرا ودعمهم بلاعبين مميزين من خارج الفريق راح يكون الفريق خلال الثلاث المواسم القادمة فريق صعب جدا. الموسم القادم راح يكون الاختبار الحقيقي لبداية المشروع وخاصة بان اول موسم للمدرب غالبا يكون صعب. |
| الساعة الآن 04:15 PM |
Powered by vBulletin® Copyright ©2000 - 2025, Jelsoft Enterprises Ltd. TranZ By Almuhajir